Kruč & Mundimitar

Kruč

Acquaviva Collecroce, na našu Kruč, sa nahoda zgora jenga brda, ka je 425 metri zgora mora aš je naduga 60 km do Kambavaša, kapoluog do redžijune, aš 35 km do Termule, zgora mora. Kruč je nikla oklo deset sekuli naza, kako sa more vit do nikihi dokumendi storikihi.

Oklo lu 1500 nike čeljade zlave, ka gredahu do Dalmacije, bižuč do Turki, su dol za bitat na ove mista ka su bi ostal sendza čeljadi dopa taramuta do lu 1456. Lu 1562 su čil kapitulacijune s Kavaliri jiz Malte e su mogl ulist u grad. Kavalire su držal feud ‘z Kruča fina lu 1785.

Stari jezik sa govore još e sa zova NA-NAŠU, e je jena djalet kroat štokavo-ikavo. Oklo grada jesu čuda fundi aš fundici: Mrmarica, Pišaraj, Funda Nova, Funda Stara, Kortij.

Crikva, ka je dedicana Blažanicu (Sveta Marija Ester), je bila zidžana, na mista jene crikve indike veče male, lu 1715, kako je pisano zgora vrat malihi do crikve. Skola, kjaca aš jena put do burge, jesu dedikane Nikolu Neru (1761-1799), Komisarij do Republike jiz Napule (Partenopea) ka, nazanju votu ka je si ga poša do grada, je reka: “Nemojte zabit naš lipi jezik!”.

Mundimitar je jena grad u Molise di se govore na-našo pet sekuli. Se nahoda kurto Abruzza (je razdiljen do njega s rikom Trinjo), zgora jenoga brda 508 metri zgora mora. Ima 274 čeljadi.

Prve nuticje zgora Mundimitra jesu do gošta 1024. Benja prvi misto di su živil kroate ke su rival u Mundimitar je jena misto tri kilometra do grada ke se zove Selo, ke kroat sinjifika ‘mali grad’.

Stari grad Mundimitra, s ruvami oš sutiti, je bija činjen okolo Crikue do sta Luce, ke je do sekuli XVII/XVIII. Pri u criku biše pur jena mala štatua do driveta do sta Luce, ke je bila ukredžena pri do Sekonde guere. Se govore ke ovu štatuu su ju donil u grad kroate, ke su rival u grad pet stotini godišt naza jena petak do maja. Zato u grad se čini fešta do sta Luce saki petak u maju, još veče čuda nazanji petak.

Na Selo se nahoda Kapela do sta Luce, ke je se tvorila lu 1935, oš, okolo nje, ono ke je ostalo do prvoga grada kroati u Mundimitar. Saku nedilju dop Uzam ode se čini Fešta do Kapele, s prčesijunom do Crikue u grad, misom u Kapel oš aštom do doldži za sveticu.

Mundimitar je Grad poezije erke ima čuda poeti ke pišu na-našo, oš kada se hodi po grado zgora hiži se moru natj targe s riči poeti do grada.

Mundimitar